AMC sum cheng nuai 1910.91 K-Deposit-ah dah mek a ni

Finance minister Lalsawta chuan MNF member Lalruatkima zawhna chhangin, chhan hrang hrang avangin K-Deposit-ah Aizawl Municipal Council (AMC) sum cheng nuai 1910.91 dah mek a nih thu House a hrilh.

Minister Lalsawta sawi danin, AMC hnena a hun taka sum pek a nih loh vangin Mizoram sorkarin a pung (interest) a chawi ṭhin a; kum 2011-2012 ah cheng nuai 10.87, kum 2012-13 ah nuai 33.28 leh kum 2013-14 ah nuai 62-te state sorkarin a chawi a ni. Kum 2011-12 a sorkar laipuiin AMC atan sum a pek pawh AMC hnena la pek loh ṭhahnem tak a la awm.

Mizoram sorkar chuan kum 1986 aṭangin K deposit-ah pawisa a dah ṭan tih sawiin, Lalsawta chuan, kum 1986-ah chuan Rs. 1,00,000 dah a nih thu a sawi a, chuta ṭang chuan kum tin K-Deposit-a sum dah chu a pung ta zel niin a sawi.

Finance Minister chuan, pawisa neih ang mil loa hman a ngaih cháng a awm ṭhin tih sawiin, "Thla tin hlawh pek a ngai a, budget siam mah ila pek tur a awm miau loh chuan a awm ang ang pek mai a ngai ṭhin. Court aṭanga compensation pe tura rawn tih thut thute a awm ṭhin, hengte hi chu budget-ah dah theih pawh a ni lo," a ti.