MJA leh Chief Secretary inkawm Journalist hmasawnna sawiho

Mizoram Journalist Association (MJA) hruai­tute chuan nimin khan chief secretary Lalmalsawma a pisaah an kâwm a, thil pawimawh hrang hrang an sawipui.

MJA hruaitute chuan, Mizoram sorkarin accredited journalist-te an hna thila zin an nih chuan Mizoram House/Rest House/Inspection Bungalow hrang hrangah sorkar hnathawk group-A tlukpuia ‘Official on duty’ anga thlen a phalsak chu lawmawm an tih thu an hrilh a; chutih rualin, Mizoram House enkawltu ṭhenkhatin ‘Official not on duty’ anga thlentir ṭâlh an tum ṭhin chu ṭha lo an tih thu an sawi.

Journalist-te chu ni khatah darkar 24 chhung duty an nih avangin khawi aṭang pawhin hna an thawk reng tih sawiin, MJA hruaitute chuan, sorkar hnathawkte anga order copy leh file nei an nih ve loh avangin an hna thila zin an nih phawt chuan ‘Official on duty’ anga thlentir zel an nih theih nana hma laksak tur turin Chief Secretary an ngen a; room inpek danah, ṭha leh mumal zawka kalpui a nih theih nana hma laksak turin an ngen bawk.

MJA hruaitute chuan, Central sum hmanga Aizawla Press Enclave din tura rua­hmanna an siam, Mizoram sorkara inchiah mek chu Mizoram sorkar ngaih pawimawh bik, priority list-ah telh a nih ngei theih nana theih­tawp chhuahpui turin Chief Secretary an ngen bawk a ni.

CS Lalmalsawma chuan, MJA hruaitute ngenna chu a ṭul anga a lo bawhzui tur thu a lo hrilh.