Sorkar hnathawkte'n House thu leh MLA-te an ngai pawimawh tawk lo - CM

Nimina Assembly session-ah sorkar hnathawkte'n House-a thusawi leh MLA-te an ngaih pawimawh loh ṭhin thu sawi lan a ni. Chief minister Lal Thanhawla chuan, sorkar hnathawkte an inen lêt theihna atan vohbik an nihna palzûtna motion (priviledge motion) pu lut awm se ṭhaa a rin thu a sawi.

INC member PC Zoram Sangliana chuan, "March 24, 2015 Assembly session-a 'The Mizoram Right to Public Services Bill, 2015' sawiho ṭuma Chief Minister-in sorkar hnathawk zawng zawngte hnenah MP, MLA, ex-MLA leh ex-MP te chungchanga House kaltlanga order a pek kha sorkarin a bawhzui em?" tiin a zawt a; GAD changtu, chief minister Lal Thanhawla chuan, he thil hi bawhzui mai a nih loh thu a sawi.
Lal Thanhawla chuan, House-a thusawi bawhzui mumal a ni lo chu pawi a tih thu sawiin, "Sorkar hnathawkte'n House proceeding an vil ngun tur a ni a, bawhzui chi a awm em tih an ngaihtuah reng tur a ni. He thil hian sokar kalphung a tilang chiang hle. Mualpho tur an awm a nih chuan a hminga hotu ber hi mualpho tur ka ni," a ti a; House-a a thusawi an bawhzui lawk loh avangin member-te hnenah ngaihdam a dil.
Chief Minister sawi danin, sorkar official-te chuan 'an inrinthulh vangin an bawhzui lawk lo' tih chhuanlam an siam. He thilah hian nimin zing khan office memorandum tihchhuah a ni.
Assembly-a committee péng hrang hrangte pawhin sorkar hnathawk lakah vuivaina an neih ṭhin thu sawiin Lal Thanhawla chuan, "Privilege motion-te pawh pu lutte awm se, an inenfiahna atan thil ṭha tak a nih ka ring," a ti a; House-a an thusawite chu sorkar hnathawkte'n inenfiahna atan hmang se a duh thu a sawi.
Opposition group leader Vanlal­zawma chuan, House Leader thusawi an bawhzui thuai lo chu pawi a tih thu sawiin, "Sorkar hnathawk zingah kan nihna hre chiang si, min dawngsawng ṭha duh lo an awm ṭhin hi a dik em aw? Min zah em em se kan ti a ni lo a, a hminga mipui thlan tlin kan nih ve avangin min zah derna chin nei se kan ti a ni," a ti.