KHAWTHIR

Yoga bawhzui lo
School Education minister H Rohluna chuan MNF member Lalrin­awma zawhna ziaka chhangin, 'Compulsory Teaching of Yoga in Educational Institution Act, 2014' hmang turin hmalakna a awm rih loh thu a tarlang.

CM Relief Fund
Champhai District Football Association chuan, tun hnaia Chhangphut Field-a charity football match an buatsaihnaa an hmuh chhuah aṭangin Chief Minister's Relief Fund-ah nimin khan Rs. 20,000 an chhung lut.

MJA Library pe
MJA Public Library-a dah turin B Lalrinhlua'n a lehkhabu ziah, 'Beiseina' tih bu hnih a pe a; Lalzidinga Sailo-in a lehkhabu ziah 'Mi-ssionary puitu' tih a pe bawk. Lehkhabu petute chungah MJA chuan lawmthu a sawi a ni.

Bye-election
Saiha District Level Standing Committee chu nimin khan an ṭhu-khawm a, July 20, 2015-a Saiha district-a V/C palia bye-election neih tur an sawiho. Bye-election neihna turte hi - Chhaolo-II, Siata-II, Maisa leh Ahmypi khuate a ni. Meeting hi District Election Officer mawhphurhna la mektu Marilyn Rualzakhumthangi’n a kaihhruai a ni.

Car chesualah thi
Nimin tlai dar 4:00 vel khan Mizoram University main gate bulah Alto K10 car chesualin, Ngurnghinglova, MZU-a peon, Nursery Veng chu damdawi-in panpui a nih hnuah a thi. Car hi kawng thlangah a lum a, car-a chuang MZU-a thawktu dang pahnih pawhin hliam an tuar.

Rinhlelh pakhat la
July 8, 2015 zinga thláma Lalrinchhana (45) leh a nupui Lalzuimawii (40), Chhan­chhuahna Khawpui te an ramriahna thláma thia chhar kaihhnawihah police-te'n thu zawhfiah atan Lalzuimawii laina hnai mipa pakhat an la. Police hotute hnen
aṭanga thu dawn danin, Lalrinchhana leh a nupui taksaah sahna hnûhmá a awm nual a, Lalrinchhan­a taksaah silaia kahna hnûhmá a awm bawk.