City Bus chak chi Greenline Express July 13-ah Aizawlah a tlan tan dawn

Aizawl Municipal Council (AMC) leh Aizawl City Bus Owners' Asso­ciation (ACBOA) ṭang­rual chuan, July 13, 2015 aṭangin Aizawlah city bus stand tina ding lo tur leh rang zawk tura ngaih, Greenline Express bus tlantir an tum.

Green Line Bus tlantir tur chungchangah hian nimin khan Aizawl Press Club-ah AMC executive councillor Rosiamngheta leh ACBOA hruaitute'n press conference an nei. Rosiamngheta chuan, The Mizoram Municipality Act 2007, 57 (1) (a) (vi)-in thuneihna a pek angin, mipuite awlsamna tura ngaiin AMC chuan express bus tlantir ṭha a ti a, mipuite'n an chhawr ṭangkai ngei a beisei thu a sawi.

Rosiamngheta chuan, Aizawla traffic tâwt lutuk chu tihziaawm a ṭul tak zet tawh a, chetvêl awlsamna tur bakah hriselna atan lirthei tihtlem chu tihmâkmawh a nih thu a sawi a, "Lirtheiin a tihchhuah meikhû vangin cancer a pung niin a lang a, khawpui boruak tithianghlim turin lirtheite hawl chhuak tlêm a, public transport hman tam mipuite'n kan zir a ngai," a ti. AMC-in Aizawl nuam, him leh ṭha zawk siam tura a hmalakna thlawp turin mipuite a ngen a ni.

ACBOA hotute chuan, Greenline Express bus tlantir dan tura ruahmannate an sawifiah a; tunah hian Aizawlah city bus 260 vel a awm a, line bus chhiar tel loin ni tin city bus 161 an tlan ṭhin a, bus 40 vel an châwl ziah thung tih an sawi.

City bus ding ṭhinte chu Greenline Express bus atan hman a ni dawn a, ni tin bus 10 an tlân ṭhin ang. Express bus-ah seat awm zat aia tam mihring phurh an tum lo a, Ngaizel leh Zemawbawk inkarah stand paruk a awm dawn a, stand ni loah chuan lâwn leh chhuk theih a ni dawn lo.