Thla thum chhunga sum hman tur Rs.18,23,81,44,000 House-ah pass

August-October 2015 chhunga Mizoram sorkar sum hman tur ruahman, Vote on Account Rs. 18,23,81,44,000 chu nimin khan Assembly House-ah pass a ni.

July 7, 2015-a ṭan Mizoram Assembly budget session chu nimin tlai dar 3:15 khan speaker Hiphei-a'n a titawp. Speaker chuan, zawhna House-a chhân chi (starred question) lut 69 zinga 12 chhân hman a nih thu a sawi.

Session ṭan nía Finance Minister-in Vote on Account pass tak Rs. 18,23,81,44,000 zinga Rs. 16,76,35,27,000 chu sorkar department hrang hrang hman tur a ni a, Rs. 1,47,46,17,000 chu Legislative Assembly, Governor, High Court leh MPSC-te hman tur a ni. Vote on Account sum hman phalna, The Mizoram Appropriation No. 4 Bill, 2015 pawh pass nghal a ni.

Nimin khan Taxation minister Lalsawta put luh, The Mizoram Entry Tax Bill, 2015 chu pass a ni. Lalsawta chuan, Mizorama bungraw lak luh ṭhenkhat aṭangin chhiah 'entry tax' lak tum a ni tih sawiin, "Chhiah tling khawm chu kawng siam nan leh lei dawh nan te, kawlphetha, tui in tur leh hriselna leh thianghlimna atantea hman a nih dawn bakah, tualchhung rorel khawl leh sorkar agency-te sum lama ṭanpuina tur a ni," a ti.

UD&PA minister Zodintluanga put luh, The Mizoram Municipalities (Third Amendment) Bill, 2015 pawh pass a ni. Zodintluanga chuan, kum 2007-a pass tawh, The Mizoram Municipalities Bill chu siamṭhat leh a ngaih avangin a siamṭhatna tur duan a nih thu a sawi a; mihring nuai thum awmna chin khawpuiah Municipal Corporation neih theih a nih avangin 'chairman' aiah 'mayor' tih vuah a ngaih thu a sawi bawk.

Nimin session-ah vêk khan UD&PA Minister put luh, 'The Employment of Mannual Scavenger and Construction of Dry Latrine (Prohibition) Act, 1993' paihna tur resolution pass a ni.