ITI thar sak tura harsatna sawifiah

Labour, Employment & Industrial Training (LEIT) minister Lalrinmawia Ralte chuan, Chhiahtlang leh West Phaileng khuaa Industrial Training Institute (ITI) din turah ram chung­changah harsatna an tawh thu House a hrilh.

MNF member Lalrinawma zawhna chhangin Lalrinmawia Ralte chuan, "Chhiahtlanga ITI dinna tur hi P&E department ram a ni a, contractor-in hna ṭan a tumin P&E-in stay turin an ti a ni. Mahse, tunah chuan ram hi tihfel a ni tawh a, a kaltluan zel kan beisei. Ram a fel loh vang hian contractor-in hun rei tak hna a thawh theih loh phah a ni," a ti.

Chhiahtlanga ITI tur sak hna hi Nextt. Comm Consultancy-in an thawk a, thawh zawh hun tura ruahman chu April 18, 2015 a ni. Tun dinhmunah hna 15% zawh a ni tawh.

INC member Lalrobiaka zawhna chhangin, LEIT Minister chuan, "West Phailenga ITI dinna tur hi mi ram pek a ni a, ram inhlan chhâwn danah thil fel lo a awm a, tihfel thuai kan beisei. Contractor pawh thlan vek a ni tawh," a ti.