Faina beihpui thlâkna hawn a ni

18th September, 2025

Urban Development & Poverty Alliviation (UDPA) minister K Sapdanga chuan nimin khan Secre-tariat conference hall-ah faina beihpui thlakna, Swachhata Hi Seva Campaign a hawng. Kumina Campaign thupui chu, 'Blending community action and festival spirit' tih a ni.

UDPA Minister chuan, India ram pum rualin Mizoramah faina beihpui thlâkna hawn a ni ta tih sawiin, "Faina kawnga ṭan lak hi phurritah la loin, thil hlimawm leh hun nuam tak anga kan hman thiam a ngai a, chu chu kumin Swachhata Hi Seva thupui pawhin a tum a ni," a ti.

Mahatma Gandhi-a'n 'Faina hi zalenna ai pawha pawimawh zawk a ni’ tia a sawi thu sawiin K Sapdanga chuan, "Mizote hian faina hi a nuna kan nunpui a hun tawh tak zet a ni," a ti a; kal khawmte chu mi dangte thinlungah 'Faina chu mi tin tan a ni' tih pu darh ṭheuh turin a chah.

Campaign hawnna inkhawm hi UDPA secretary Lalmalsawma Pachuau-in a kaihruai a, PHE secretary Teresy Vanlalhruaii leh UDPA director Jacob Lalawmpuia te pawhin thu an sawi.

Swachhata Hi Seva Campaign hi September 17 - October 2, 2025 chhung hman tur a ni a; campaign chhungin khawlai leh hmun kilkhawrte tihfai tur niin, thupui angin faina beihpui thlak hi a hlimawm zâwng leh phûrawm taka kalpui tum a ni.

Nimin vêk khan district dangahte leh SDO/BDO ṭhuthmunahte pawh Swachhata Hi Seva Campaign hawn a ni a, hmun eng emaw zatah faina hnatlang huaihawt nghal a ni.

Siahaah chuan DC pisa tuala hawnna inkhawm hman zawhah Faina Kawngzawh huaihawt a ni a; DC pisa aṭanga Bazar Traffic Point thleng kalin, kawngpui leh a chhehvela bawlhhlawhte an chhar khawm a ni. Mamitah pawh Bazar Veng leh Charkawn inkar kawngpui dung tihfai hnatlang an huaihawt.

Serchhipah chuan Swachhata Hi Seva Campaign pualin September 19 hian sanitation worker-te tan Serchhip District Hospital-ah free health camp buatsaih a ni dawn a; September 25-ah zirna-in hrang hrang, damdawi-in, pisa leh vantlang hmun pawimawhte tihfai hnatlangpui huaihawt a ni ang.

Hnahthialah chuan Swachhata Hi Seva Campaign pualin flyer/poster siama intihsiak buasaih a nih dawn bakah, sikulah awareness quiz buatsaih a ni dawn a; sanitation worker-te hriselna dinhmun enfiah a ni dawn bawk.