KHAWTHLIR

Thisen pe

Mizoram Synod hnuaia Missionary Training College chuan nimin khan an college-ah thisen pek an huaihawt a, Synod Hospital tan thisen unit 37 an pe a, petute mipa 28 leh hmeichhia pakua an ni. BJP, Mizoram pawhin Sewa Pakhwada hawnna pualin nimin khan Civil Hospital, Aizawl tan thisen unit 35 an pe a, petute mipa 33 leh hmeichhia pahnih an ni.

AMC châwl dawn

Aizawl Municipal commissioner Joseph H Lalramsanga chuan thuchhuah siamin, Aizawl Municipal Corporation Employees' Association (AMCEA) hmalaknain vawiin leh naktuk hian AMC office-a thawkte'n sports an neih dawn thu a tarlang. Sports neih a nih dawn avangin AMC office chu mipui tan dawr theih an nih dawn loh thu tarlangin, mipui hriatthiamna a ngen nghal bawk.

Free health camp

Sorkar laipui hmalakna, Swasth Nari, Sashakt Parivar Abhiyaan hnuaiah nimin khan RIPANS chuan Zemabawka Salvation Army conference hall-ah 'Free medical & health camps' an buatsaih a, Health & Family Welfare minister Lalrinpuii'n a hawng. RIPANS director Dr Sanjay D Sawant chuan, health camp chu vawi 10 neih an tum thu a sawi.

Puanṭhui zirna

Champhai North bialtu MLA H Ginzalala chuan nimin khan Champhai New Market (CHANEM)-a Skill Development & Entrepreneurship Incubation Centre-ah puanṭhui zirna (tailoring training pilot course) a hawng. Puanṭhui zirna hi Champhai District Industries Centre huaihawt a ni a, puanṭhui zir turin mi 15 thlan niin, thla ruk chhung an zir ang.

District Process Lab

Lunglei, Champhai leh Mamit district-ahte nimin khan Ministry of Tribal Affairs hnuaia tribal-te hmasawnna tur leh vantlang thawhhona kaltlanga khawtlang hmasawnna a awm theih nana hmalakna, Aadi Karmayogi Abhiyan hnuaiah District Process Lab training ṭan a ni. Aadi Karmayogi Abhiyan hi Viksit Bharat 2047, India Independence kum 100 tlinna tur tinzawna ram hmasawn nihna kawnga ram pum huapa chet chhuahna tur leh danglamna thlentu (change leader) mi nuai 20 chher chhuahna tur a ni.