LESDE Minister-in Maharashtra Minister a kâwm

Labour, Employment, Skill Development & Entrepreneurship (LESDE) miniser Lalnghinglova Hmar chuan September 16, Thawhlehni khan Maharashtra Labour minister Akash Fundkar chu Mumbai-a a pisaah a hmu a, labour chungchanga thawhho theih dan tur a sawipui.

Lalnghinglova Hmar chuan, Maharashtra chu state lian leh hausa, labour chungchangah kalphung ngêlnghet tak nei a nih thu sawiin, Mizoram tan zir tur eng emaw zat a awm thu a sawi a; Mizoram leh Maharashtra ten ‘labour’ an kalpuinaa an tih dan ṭha laite inzir tawn a duh thu Maharashtra Minister a hrilh.

Akash Fundkar chuan, Maharashtra-a labour chungchang ṭha taka an kalpui dante zir chiang tura official-te tir turin a sáwm a, theihtawp chhuahpui a tum thu a sawi.

Minister pahnihte hian corporate social responsibility lama hmalak dante pawh an sawi dun a; Mumbai sumdawnna, Mizoram tana ṭangkai turte inhmelhriattir leh kawng kawhhmuh tura hmalak a tum thu Akash Fundkar chuan a sawi a ni.

Lalnghinglova Hmar hian Thawhlehni vêk khan Tata Trusts chief executive officer Siddharth Sharma pawh Mumbai-a Tata Trusts pisaah a hmun a, Aizawla Badminton High Performance Centre sak chungchanga thawhho dan tur a sawipui.

High Performance Centre-ah hian badminton court 10 awm tura ruahman a ni a, senso tur zat leh sum hmuhna turte an sawi dun. Siddharth Sharma chuan, Tata Trusts-in Mizorama badminton hmunpui sakna tur a puitlin theih nan theihtawpa puih an tum thu a lo hrilh.

Minister hi Mizoram State Sports Council secretary Henry C Lalrawnkima'n a ṭawiawm a ni.