Mizoramah Rashtriya Poshan Maah hawng

Women & Child Development (WCD) buatsaihin nimin khan Dawrpui Multipurpose Centre-ah September 17 aṭanga October 16, 2025 thlenga hman tur Rashtriya Poshan Maah hawnna hun hman a ni a; kumina thupui chu 'Healthy Woman, Empowered Family' tih a ni.

Rashtriya Poshan Maah hawnnaah hian sikul leh college-a zirlaite an tel a, WCD director Zoramthangi Chhangte-in thu a sawi. Tukṭhuan hrisel (healthy breakfast) siam dan zirho a ni a, Anganwadi Workers Training Centre-a zirtirtute'n a takin an entir. 'Bodyweight Boot Camp' buatsaih niin, fitness trainer-te'n taksa sawizawi dan an zirtir a; AYUSH doctor-te'n taksa hriselna atana Yoga pawimawhna an sawifiah.

Ei leh in tur hrisel chungchang leh hriselna atana ṭha lote inzirtir a ni a; nutrition counselling hmun, nutrition hub - ei leh in hrisel tarlanna hmun leh, anaemia test, weight leh thisen endikna health checkup te buatsaih a ni bawk.

Poshan Maah hi Serchhip district-ah pawh Serchhip Kawnpui Anganwadi Centre-ah hawn a ni a, district chhunga anganwadi centre hrang hrangah nausen leh naupang ei leh in chungchang inzirtirna leh body mass index (BMI) screening neih a ni.

Serchhipa Poshan Abhiyaan block coordinator Lalnundiki chuan, nu, nau pawmte'n nausen hnute pek dan dik an hriat a pawimawh thu sawiin, nausen hriselna atan thianghlimna a pawimawh dan a sawi a; tunlaia nu leh pate'n naupangte ei tur an pek tam tak chu hriselna atana ṭha lo a nih thu a sawi. Naupange phone entir nasat lutuk chu an tana ṭha lo thei a nih thu sawiin, "Nu leh pate kan fimkhur a pawimawh," a ti.