Aizawl western by-pass road-ah leivûng paihna 23 vel siam a ṭul

Aizawl tlak lama khawpui hêlna tur kawng, western by-pass road laih mekah leivûng paihna hmun 23 vel neih a ṭula ngaih a ni a; leivung paihna tur a ruala siam a harsat avangin hna an thawhna hmasa atan leivung paihna tur (dumping site) hmun pasarih pawmsak a ni tawh.

Chief minister Lalduhoma chuan nimin khan a pisaah Aizawl western by-pass road laih mek chungchangah contractor RG Buildwell Engineer Limited hotute a pisaah a ko a, hna an thawh tawh chin leh hmachhawp te, leivung an paih dante a sawipui. Adviser to CM TBC Lalvenchhunga, CM secretary Vanlaldina Fanai, Planning secretary Lalmalsawma Pachuau, PWD engineer-in-chief H Zoramliana leh sorkar hotu dangte an tel.

Sorkar thuchhuah tarlan danin, Aizawl western by-pass road hi PM-DeVINE sum cheng vbc 500 hmanga laih tur a ni a, contractor RG Buildwell Engineer-in an lai mek. Km. 45-a thui a ni a, kawng laih hna (physical progress) 13.70% an zo tawh. Kum 2028 tir lama zo hman tura beisei a ni a, contractor-in an siam zawh aṭanga chhiara kum nga chhung an enkawl zui ang.

Tlak lama Aizawl khawpui hêlna tur kawngpui laihnaah hian leivûng paihna hmun 23 vel neih a ṭula ngaih a ni a; leivûng pahna chu a ruala siam a harsat avangin hna an thawhna hmasa tana an dumping site tur hmun pasarih chu pawmsak tawh a ni.