District 2-ah HIV Test Drive hawng

Nimin khan Aizawl leh Lawngtlaiah HIV/AIDS do beihpui thlakna leh thisen endik rûnpui kalpui mek Intensified IEC Campaign leh HIV Test Drive hawn a ni.

Aizawl district-a Intensified IEC Campaign leh HIV Test Drive kalpui tur hawnna hi District AIDS Prevention & Control Committee (DAPCC) buatsaihin Vanapa Hall-ah hman a ni a, additional DC Zoramsiama Hmar khuallian a ni. Aizawla higher secondary school pangaa zirlaite an tel a, Dr Zonunsangi Khiangte-in HIV/AIDS chungchang, kai theih dan leh inven dante a zirtir a ni.

Intensified IEC Campaign leh HIV Test Drive hi Aizawl district-ah chuan khaw 25-ah kalpui a ni ang.

Lawngtlaiah chuan DAPCC bultumin Chandmary Inpuiah hawnna inkhawm buatsaih a ni a, bawrhsapa Donny Lalruatsanga'n a hmanpui. Khuallianin fuihna thu a sawi a, ICTC councellor S Ramdinengi'n HIV/AIDS chungchangah a sawifiah. Inkhawmah hian Lawngtlaia high school, higher secondary school leh college zirlaite an tel a ni.