Vohbik zirlaite enkawl dan zirna buatsaih

SCERT leh RMSA-te chuan nimin khan School Education directorate conference hall-ah, high school-a zirlai vohbikte enkawl dan tur zirhona an buatsaih a, SCERT director Malsawmthangi'n a hmanpui.

Malsawmthangi chuan, SCERT-in vohbikte enkawl hna kum 30 vel a kalpui tawh a, RMSA awm hnuah RMSA kuta dah a nih thu a sawi a, "Rualbanlote hian anmahni enkawltute hi eng rilru pu nge an nih an hre thuai ṭhin. Khawvelin a enkawl dan leh a ngaihdan a danglam zel a, an tih theih záwng leh thiam theih zawng a danglam ṭhin," tiin, enkawlnaah rilru dik put a ṭul thu a sawi.

Training-ah hian district tina RMSA IEDSS coordinator-te an tel a; SCERT special education officer Sangzuali Vanchhawng, RMSA deputy state project director VL Malsawma, RMSA FAO Lalliansanga, IEDSS coordinator Zothan­kima leh assistant coordinator Lalremsangi ten thil pawimawhte an zirtir a ni.