FAO kaltlangin Mizoram chhungah $ 4,96,000 hmangin hna thawk dawn

UN Joint Initiative Project hnuaia Mizoram sorkar leh UN hnuaia pêng palite thawhhona atan sum hmuh ṭan a nih thu sorkar thuchhuahin a tarlang.

UN Joint Initiative Project-ah hian UN hnuaia péng pali - Food and Agricultural Organisation (FAO), UN Development Programme (UNDP), United Nations Industrial Development Organization (UNIDO) leh International Labour Organisation (ILO)-te an tel a; October 16, 2014-aah Mizoram sorkar nena thawhhona turin thuthlung ziah a ni.

Sorkar tarlan danin, FAO hnuaia project siam, US dollar 4,96,000 (Rs. 3,15,30,720) hû chu FAO kaltlanga hman turin sorkar laipuia Ministry of Agriculture leh India rama FAO hotute'n July 3, 2015-ah an ziak fel a; July 8 khan UN Office aṭangin agreement copy leh clearance-te chu Mizoram sorkarah pek a ni.

Inremnaah hian Ministry of Agriculture aiawhin joint secretary Rajesh Kumar Singh leh UN aiawhin FAO Representative in India Kevin D Gallagher ten hming an ziak.

FAO hnuai bika hmalakna tur project hming chu - Development of Extension and Outreach and Managerial Capacities by State and Public Institutions in Mizoram (within context of UN Joint Initiative/New Land Use Policy Board) tih a ni a; project ṭan hun chu April 2015 niin, March 2017-ah zawh tura tih a ni.