Sunshine Overseas chungchangah Thu dik puan chhuah a phût

Nimin Assembly Session-ah MNF member Lalruatkima chuan tun hnaiah scroll.in thil chhuinaah chief minister Lal Thanhawla chu a unaupa Lal Thanzara firm duhsakah puh a nih thu a sawi a; thil awm dan dik tak Mizoram mipui hriata puan chhuah a duh thu a sawi.

Lalruatkima hian Speaker hnenah thu sawi a dil a, phalsak a ni. Lalruatkima chuan, "Hetianga kan Chief Minister zahawm tak an rawn puh hi a zahthlak a, a hrehawm pawh kan ti. Kan House zahawm tak tihzahawm lohna pawh a ni theiin ka hria. He thil hi tak tak a nih chuan eng nge thil awmzia tih hi Zoram mipui hriatahte pawh hian he House zahawm tak kaltlang pawh hianin hriat vete pawh a ṭha lo'm ni," a ti.

Scroll.in hian CM Lal Thanhawla nau Lal Thanzara, Health minister chu Sunshine Oveseas-ah share a neiah puhin, Sunshine Overseas chu Mizoram sorkarin hna pek kawngah a duhsak hle niin an tarlang.

Lalruatkima chuan March 28, 2015-a Government Assurance Committee-te'n Zokhawthiang dáia vanduaina an tawh chungchang chu Assembly House-a chhin­chhiah a duh thu a sawi bawk a; kha thil thleng vanga nunna chánte chu Finance department-in October 27, 2010-a memorandum a tihchhuah angin, Rs. 15,00,000-a râl a phut a ni.