MNYF-in CBI chhui hlauah sorkar an puh

MNF ṭhalaite chuan thuchhuah siamin, Congress party kaihhruai Mizoram sorkar chu Central Bureau of Investigation (CBI) chhui hlauah an puh.

MNYF chuan, Congress party-in sorkarna an chan hma aṭanga an auhla chu, ‘Corruption a zung nen kan phoro ang’ tih te, 'CBI kan ko lut ang' tihte a nih thu te, thuvawnah 'Rorelna dik chu luipui angin luang rawh se' tih an hman thute an sawi a; chutih laiin, CBI-in Mizorama high security registration plate (HSRP) kalpui dan chhui an dilna chu Mizoram sorkarin a hnâwl leh si niin an tarlang.

HSRP kalpui dana a thil fel lo awm nia lang CBI-in chhui an dilna Mizoram sorkarin a hnâwl chu thil dik lo thup tumnaa an ngaih thu sawiin, MNYF chuan, "Curruption a zung nen phoro an tum tak tak a nih chuan hnu chhui thiam kan neih CBI-te an ko lut ngam turah kan ngai," an ti.

MNF ṭhalaite chuan, Congress kaihhruai sor­kar chu corruption a zung nen phoro tum lo a, vulh lian zawka an ngaih thu an sawi a ni.