ZNP-in Cabinet sîksâwi turin CM an ngen

ZNP party chuan thuchhuah siamin, Finance minister Lalsawta leh UD&PA minister Zodintluanga te chu minister an nih anga an hna chanpual tlin loah an puh a; Cabinet minister-te sîksâwi turin Chief Minister an ngen.

ZNP chuan, Finance Minister-in chhan hrang hrang vanga Aizawl Municipal Council (AMC) sum nuai 1910.91 K-Deposit-a dah a nih thu a sawi chu vanduaithlak an tih thu leh ngaihzam mai chîa an ngaih loh thu an sawi. Mizoram sorkar chu AMC pian tirh aṭanga harsatna tam tak siamsak tawhah an puh a ni.

ZNP tarlan danin, Central aṭanga AMC sum tur lo kal, General Basic Grant (GBG) leh General Perfomance Grant (GPG)-te chu nodal department UD&PA account-ah a lut hmasa a, a luh aṭanga ni nga chhungin AMC hnenah pek tur a ni. Ni nga chhunga pek loh chuan oenal Interest sorkarin a chawi a ngai.

ZNP chuan, Mizoram sorkarin AMC sumte chu a hun takah a pe chhuak duh ngai lo a, chuvang chuan Mizoram sorkarin penal interest cheng nuai 100 chuang a chawi tawh niin an sawi.