Delph-a'n Micah Richards a râwn

Manchester City defender hlui Micah Richards chuan a club thar Aston Villa midfielder Fabian Delph chuan City a zawm dawn leh dawn loh thuah a râwn thu a sawi.

Kum 25-a upa England national midfielder Delph hi tunah hian City in lakluh tumin an dawr mek a, thutlukna a siam hmain tawnhriat ngah tawh Richards a thurawn a ngaichang a ni. Villa captain Delph hi a contract neih laiah chuan pound maktaduai 8 a lei ngam an awm chuan an dawr thei ang tih a awm.

Season thar atana training a neihpui mek Delph chungchang sawiin Richards chuan, "Champions League khelh a châk a nih chuan City-ah a kal thei ang, mah se hmun nghet a chang duh a nih chuan kal suh se. Amaherawhchu Delph hi player ṭha tak a nih avangin a khelh ṭhat phawt chuan City-ah pawh hmun a chang thei ang," tiin a sawi.

Kum 27-a upa Richards hi Manches­ter City captain hial ni tawh mah se player ṭha lak luh hnuah khelhna hmun a chan tam loh avangin City hi a chhuahsan ta a ni.