COVID-19: Mizoram dinhmun Hri vei chhuak tawh zat 98.26%

January 7, Ningani khan Mizoramah Covid-19 vei mi pathum hmuh chhuah a ni a, an zingah symptom nei leh tualchhunga kái pahnih ve ve an awm. Nimin khan hripui laka fihlim tawh mi 13 chhuahtir an ni a; chhuahtir tawh zat chu 98.26% a tling.

Ningania Covid-19 vei hmuh tharte chu ZMC laboratory-a hmuh chhuah mi pakhat leh Rapid Antigen Test (RAT) hmanga hmuh chhuah mi pahnih an ni a, mipa pakhat leh hmeichhia pahnih an ni. TrueNAT-PCR hmanga swab sample endik zingah hripui vei an awm lo.

Nimin khan hripui laka fihlim tawh mi 13 chu enkawlna hmun aṭangin chhuahtir an ni a; SRH-ZMC, ITI CCC leh Serchhip Nursing School CCC aṭangin mi pahnih ṭheuh, Lunglei Sazaikawn CCC aṭangin paruk leh Hnahthial CCC aṭangin mi pakhat an chhuak a ni.

Mizorama Covid-19 vei hmuh chhuah tawh chu mi 4,259 an ni a, mipa 3,128 leh hmeichhia 1,131 an ni. Nimin tlai dar 5 thleng khan damin mi 4,185 (98.26%) chhuahtir an ni tawh a, mi pariat (0.19%) thi tawhin, enkawl mek mi 66 (1.55%) an awm.

January 7, Nilaini khan Mizoramah swab sample 1,092 endik a ni a, ZMC laboratory-ah sample 278, TrueNAT-PCR hmangin district paliah sample 134 leh RAT hmangin district pasarihah sample 680 endik a ni. Covid-19 vei mi pathum hmuh chhuah chu endik zat aṭangin 0.27% a tling.

Sorkar thuchhuah tarlan danin, ZMC laboratory-a Covid-19 positive hmuh chhuah awmchhun chu Bawngkawna hmeichhia kum 31 mi, tun hnaia Uttarakhand aṭanga haw a ni a, home quarantine lai niin, Covid-19 symptom nei lo a ni.

RAT hmanga hmuh chhuah mi pahnih chu Mizoram chhunga hri kái chhâwng leh symptom nei ve ve an ni. Electric Veng, Aizawla hmeichhia kum 52 chu symptom a neih avangin private hospital pakhatah a swab sample endiktir a, Covid-19 a vei tih hmuh chhuah niin, hri a kàina hriat chian a ni lo.

RAT hmanga hmuh chhuah pakhat dang chu Ramhlun South-a mipa kum 25 mi a ni a, tualchhunga kái chhâwng niin, symptom a neih vanga private hospital pakhata swab sample endiktir a ni.

Mizoramah swab sample 1,85,161 endik a ni tawh a, chu'ng aṭang chuan Covid-19 positive mi 4,259 hmuh chhuah niin, endik zat aṭangin 2.30% a ni.

Covid-19 vei hmuh chhuah tawh mi 4,259 zinga mi 2,014 chu Mizoram chhunga kái chhâwng an ni a; mi 2,245 chu Mizoram páwn aṭanga an rawn luh hnua hmuh chhuah an ni thung.