GST thar vanga thil man hniam tur tam tak a awm - Taxation Commissioner

Commissionerate of State Tax chuan, September 22, 2025 aṭanga India ram puma Goods & Services Tax (GST) rate bituk thar leh tihniam chungchang Taxation officer-te hrilhfiahna an auditorium-ah an buatsaih a; Taxation commissioner HK Lalhawngliana chuan GST thar vangin thil man hniam phah tur tam tak a awm dawn thu a sawi.

Taxation Commissioner chuan, GST Council-in September 3, 2025 khan GST rate thar hmanna tur a rêl tih a sawi a, "GST rate thar hmanga India ramin tax reform a kalpui tur hi September 22, 2025-ah hman ṭan tur a ni. GST rate hlawm pali awm ṭhin chu hlawm lian pahnih (two slabs)-ah kalpui a ni tawh ang. Bungrua leh tha (service) hralhnaa GST rate chu 5% leh 18% a ni tlangpui dawn a, vaihlo leh a kaihhnawih thilah 28% GST lak a ni ang a, lirthei ṭhenkhatah 40% a ni ang," a ti.

GST rate tihdanglam tur hi a tlangpuiin a hniam zawnga a kal dawn avangin thil man hniam phah tur tam tak a awm dawn thu sawiin HK Lalhawngliana chuan, "Sorkarin GST rate a tihhniam hian a tum lian tak pakhat chu - mipui nâwlpui ban phak leh man tlawm zawka lei theih tura thil man siam ṭhat a ni," a ti a; GST hniamna tur bungrua leh tha zawrhna lama sumdawngte chuan a zawrhna man an tihniam ngei tur a nih thu a sawi.

Taxation Commis-sioner chuan, GST thar hman dik loah sorkar thîkthu a chhe hle dawn tih sawiin, "September 22, 2025 hnu lamah chuan GST rate tihhniamna bungrua leh service zuarte zingah a man tihniam lo report lut a awm chuan Anti Profiteering Measure hmanga action lak zel tur a ni. He GST reform atan hian Taxation officer-te pawh chak lehzuala hna thawh a ṭul dawn," a ti a; sumdawngte pawhin an tih ngei ngei tur - anmahni dawrtute hnenah tax invoice an pe chhuak tur a nih thu a sawi.

GST rate thar chung-chang inhrilhfiahna hunah hian thupui hrang hrang - Overview of GST 2.0/ Next Gen, Quarterly Performance Report, Penalty and Related Topics leh Anti- Profiteering Measures te zirho a ni.