KHAWTHLIR

Thisen pe

Salvation Church Ṭhalai Pawl (STP), Aizawl Area chuan STP Day (September 20) pualin nimin khan Civil Hospital, Aizawl Blood Bank-ah thisen pek an huaihawt a, thisen unit 31 pein, petute mipa 19 leh hmeichhia 12 an ni.

AR-in ruihhlo man

Assam Rifles sipaite chuan September 17, Nilaini khan Zemabawkah Lalchhuanmawia (25), Champhai Zote nia inchhal hnen aṭangin heroin (no. 4) gram 12 an man. September 17 vek khan Champhai Zote-ah mi pakhatin a tlanchhiatsan meth kg. 34.218 an man bawk.

Financial literacy

Mizoram Rural Bank chuan nimin khan Sairangah Financial Literacy Programme leh Campaign for Saturation of FI Schemes an buatsaih a, bank lama hotu hrang hrangte leh khawtual mite an tel. Mithiamte'n KYC update chungchang te, PMJDY account neih pawimawhna leh ṭhatna te, PMJJBY (life insurance) leh PMSBY (accidental insurance) chungchangte an hrilhfiah a ni.

Kolasib dist-ah YMA Chhang tihnun rel

Kolasib bawrhsap Robert C Lalhmangaiha hoin nimin khan sorkar laipui hnuaia ruihhlo dona pêng pakhat, district level NCORD committee an ṭhu a; tleirawlte'n ruihhlo donaah thâ an thawh ve theih nan a theih anga YMA Chhang tihnuna kalpui an rêl.

Dampa by-election atan inbuatsaih zel

Dampa biala MLA by-election neih tura candidate-te sum hman dan tur bithliah chungchangah nimin khan District Expenditure Monitoring Committee member-te leh political party aiawhte Mamit district election officer K Laltlawmlova, bawrhsap kaihhruiin an ṭhukhawm. Candidate-te sum hman felfai taka chhût a nih theih nan sum hman ngaihna tur rate hrang hrangte siam a ni.

Lalut dawn

Governor Gen VK Singh chuan vawiin chawhma dar 11 hian Raj Bhavan-ah ombudsman atan C Lalthanmawia rinawmna thu tiam tirin a lalut dawn.