Lehkhabu ṭhate chhiar uar turin HTE Minister-in zirlaite a chah

Higher and Technical Education minister Dr Vanlalthlana chuan, zirlaite chu an zirlaiah theihtawp chhuah tur an nih rualin, an ngaihtuahna leh khawthlir tihhmasawn nan syllabus páwn lam lehkhabu ṭhate chhiar uar turin a chah.

HTE Minister hian nimin khan Dawrpui Multipurpose Hall-ah Aizawl West College Week khârna a hmanpui a; zirlaibu piah lamah taksa insawizawina te, infiamnate chu rilru tiharh a, tumruhna siamtu leh puitlin inzirna ṭha tak a nih thu sawiin, "In zirlaiah theihtawp chhuah tur in nih rualin, in ngaihtuahna leh khawthlir tihhmasawna tihzau nan syllabus pawn lam lehkhabu ṭha tak takte in chhiar uar a pawimawh," a ti.

Dr Vanlalthlana chuan, tuna college zirlaite'n khawvel an hmachhawn tur chu tun hma nen a inan tawh loh thu sawiin, "Graduate hnua hna in zawn hunah mahni mihringpuite chauh ni loin, hna pêng tam takah artificial intelligence nen in inel a la ngai chho dawn. Chuvang chuan, kawng engkimah mahni ṭheuh hma sawn a, in thlen san theih ber dinhmun luah turin theihtawp in chhuah a ngai dawn a ni," a ti a; hahchawlh duh vanga ruih theih thil leh chìn ṭha lo lam pan lo turin a fuih bawk.

Aizawl West College-ah hian zirlai 700 vel an awm mek a; College Week kharna inkhawmah hian HTE Minister hian intihsiakna hrang hranga ti ṭhate hnenah lawmman a hlan a ni.