Aizawlah Japan ṭawng zirna hawng turin NSDCI hotu ngen

Mizoram Youth Commission (MYC) chairman Malsawmzuala Ralte chuan nimin khan National Skill Develop-ment Corporation International (NSDCI) chief executive officer Alok Kumar chu New Delhi-a a pisaah a kâwm a; Aizawla MYC office-ah Japan ṭawng zirna hawng turin a ngen.

Malsawmzuala Ralte chuan, Mizo ṭhalai zingah Japan rama care giving/nurse leh a remchang ang hna thawh châk tam tak an awm thu sawiin, "NSDCI nen thawk hoin Mizo ṭhalai Japan ṭawng zir turte Noida-ah thawn ṭhin a ni a, Mizoram aṭanga a hlat tham avangin harsatna eng eng emaw an tâwk ṭhin," a ti a; MYC office-ah Japan ṭawng zirna hawng tura ngenin, classroom tur remchang a awm sa thu leh ṭhalai tam tak zir tur an awm theih dawn thu NSDCI CEO a hrilh.

Alok Kumar chuan, MYC Chairman ngenna chu a thlàwp thu sawiin, Aizawlah a rang lama NSDCI team tirh a, hmalak zui dan tur sawiho a nih tur thu a sawi.

Japan ramah Mizo ṭhalai 100 vel hna thawkin an awm mek a, hna thawka kal turin Japan ṭawng zira pass phawt a ngai a ni.