Aizawlah ruihhlo dona atan basketball-a intihsiak leh intihhlimna buatsaih dawn

WATO Trust hotute chuan nimin khan Aizawl Press Club-ah thuthar thehdarhtute an kâwm a; October 17-18, 2025 chhungin Aizawlah basketball hmanga intihsiakna leh intihhlimna hun an buatsaih dawn thu sawiin, Mizoram ṭhalaite tel turin an sáwm.

WATO Trust president Dr Yogita chuan, an pawl chu infiamna, hnam nunphung leh inzirtirna hmanga ṭhalaite chawikanna tura hma latu pawl a nih thu a sawi a; Aizawlah 'Narco-Free Mizoram' tih thupui hmangin basketball-a intihsiakna leh kawng hrang hranga intihhlimna an buatsaih dawn thu sawiin, Mizoram sorkara department ṭhenkhatte leh Assam Rifles nen an thawhho dawn thu a sawi.

WATO Trust hotute sawi danin, October 17, 2025-ah Folkland Park-ah 3X3 basketball tournament an buatsaih dawn. Lawmman ṭha tak siam a ni dawn a, player ṭha zual pali hnenah kum khat chhung scholarship an pe dawn a, Mizo Territorial Army atana ṭha tura zawnna atan hman a ni bawk ang.

October 18, 2025 zan dar 7-ah Rajiv Gandhi Stadium-ah football exhibition match buatsaih a ni dawn a, zaithiam leh kawng hrang hranga mi lâr tak takte telin, Governor-in a hmanpui ang. Hun hman kar lakah ruihhlo ṭhat lohzia inzirtirna hun hman ṭhin tur a ni.

Assam Rifles 23 Sector DIG Brig. Puspendar Sorayan pawhin WATO Trust hun buatsaiha Assam Rifles hmalak dan turte a sawi a ni.

WATO Trust hotute chuan, an thil huaihawt turah hian Sports depart-ment, Excise & Narcotics depart-ment, Social Welfare department, Sports Authority of India, Mizoram Basketball Association, Mizoram Football Association leh Assam Rifles te nen an thawhho dawn thu an sawi.