Aizawl district-ah polling station 35 siam thar dawn

Aizawl district-ah voter 1,200 aia tam awmna polling station eng emaw zat a awm a, Election Commission of India (ECI) thupek bawhzuiin Aizawl district-ah vote thlakna hmun (polling station) thar 35 siam belh a ni dawn.

Aizawl district election officer Lalhriatpuia kaihhruaia nimina District Standing Committee on Rationalization of Polling Station ṭhukhawm chuan, ECI-in voter tana remchan zawkna ngaihtuaha voter 1,200 aia tam awmna polling station-te ṭhen emaw, a thar siam belh emaw tura thupek a chhuah an bawhzui a; polling station thar 35 siam belh rawtna an pawm.

Polling station thar siam belh rawtna hi veng chhunga political party leh tlawmngai pawlte hriatpuina leh pawmpuina hnuaiah AERO leh BLO ten a hmuna an enfiah vek hnuah siam a ni a; Aizawl district-ah hian voter 1,200 aia tam awmna polling station 35 a awm avangin polling sation thar 35 siam belh tura rawt a ni. Polling station thar 35 siam belh bakah hian, a thar siam belh loa voter siksawi a awm nual bawk.