Chhiatna hmachhawn dan inzirtirna neih a ni

Disaster Manage-ment & Rahabilitation department leh Red Cross Society, Mizoram chuan nimin khan Aizawl North College-ah college pathuma Youth Red Cross member-te tan 'Disaster Management and Rehabilitation Training' an buatsaih a; RCS Mizoram chairman H Lalengmawia'n a hawng.

H Lalengmawia chuan, RCS kalphung chu Mizo hnam nunphung nen a inhmeh thu sawiin, "Mi dangte ṭanpuina kawngah theihtawp chhuah ula, rîkrum thil a lo thlen hunah pawh RCS thuvawn ang takin mahni inphat a, mi dang tana ṭanpuitu nih tum ang che u," a ti a; Red Cross-a tel chu rawngbawlna ropui tak a ni tih hre reng tur leh mi dangte tan innghahna tlak nih tum turin zirlaite a chah.

Training-ah hian Aizawl College, Aizawl North College leh T Romana College aṭangin Youth Red Cross member-te an tel a; mithiamte'n chhiatna hmachhawn dan, chhawmdawlna thawh dan leh a kaihhnawihte an zirtir a ni.