Ombudsman atan C Lalthanmawia la lut

Governor Gen. Dr Vijay Kumar Singh chuan Mizoram State Ombudsman (independent local body) atan nimin khan C Lalthanmawia, IPS (Rtd) a la lut.

Ombudsman lak luhna inkhawm hi Raj Bhavan Durbar Hall-ah buatsaih a ni a; chief secretary H Lalengmawia'n Governor-in Ombudsman atana C Lalthanmawia a ruatna notification a chhiar chhuah hnuah Larsap Gen. VK Singh-a'n C Lalthanmawia chu Ombudsman atan rinawmna thu tiamtirin a la lut a ni.

Ombudsman lak luhnaah hian UDPA minister K Sapdanga, minister pahnih Lalthansanga leh C Lalsawivunga, Assembly deputy speaker Lalfamkima, opposition leader Lalchhhandama Ralte leh mi pawimawh dangte an tel.

C Lalthanmawia hi February 12, 1965-ah a piang a, thiamnaah BA, LLB a ni. Kum 1989-ah Mizoram Police Service-ah a lut a, kum 2022-ah IPS (AGMUT Cadre)-ah hlan kai a ni. Police-ah nihna pawimawh tak tak a chelh tawh a, DIG (Northern Range) a nih laiin February 28, 2025 khan superannuation pension-in a chhuak. Kum 2012 khan President Police Medal For Meritorious Service a dawng a, kum 2020 khan President Police Medal for Distinguished Service a dawng bawk.