Load shedding leh a kaihhnawihte Power Minister hoin sawiho a ni

Nimin khan Power & Electricity minister F Rodingliana hoin a pisaah adviser to CM (Finance) TBC Lalvenchhunga, PE department, Law & Judicial leh Finance department hotute'n power supply load shedding kalpui ṭhin chungchang leh a kaihhnawih CERC (Ancillary Services) Regulation 2022 kalpui dan tur an sawiho.

Ṭhutkhawma tarlan danin, load shedding kalpui a ngaih chhan chu - Mizoramin power a hmuhna pui ber Tuirial Hydel Power Station aṭanga kawlphetha lakna 132kV line-ah harsatna a awm chángin power mamawh (demand) phuhru turin hmun dang (generating station) aṭangin ruahman sa ni lo lak luh ‘overdraw’ a ngai ṭhin vang a ni.

Overdrawal hi tih a nih loh chuan power mamawh zat hmuh loh vangin load shedding kalpui a ngai ṭhin a; Tuirial HEP aṭanga kawlphetha lakna line dang, Tuirial 2nd Evacuation Line siam mek ni mah se, zawh a la ni lo a, harsatna a awm phah niin an sawi.

Central Electricity Regulatory Commission (CERC) chuan CERC (Ancillary Services) Regulation, 2022 a duang a; Regulation hian eng state pawhin National GRID aṭanga kawlphetha a dawn tur bituk aia tam a overdraw a nih chuan a overdraw-na zat a rang thei ang berin rid-ah chhung lut nghal turin a ti. Hemi atan hian state tinte chu kum 2026-27 aṭangin reserve power nei tura tih a ni a; reserve neih zat tur pawh a hma kuma an overdraw zat aṭangin National Load Despatch Centre (NLDC)-in a chhutsak dawn a ni.

Kum 2024 chhunga overdraw hisâpa Mizoramin reserved power a neih ngai zat chu megawatt 75 ni tura chhût a ni a, chumin ang chuan kum tin cheng vbc 75.6 vel sên belh a ngai dawn. Kum 2026-27 chhunga power reserve leina senso tur chu tun kum kal lai mek 2025-a overdraw quantum aṭanga chhût a ni ang.

Hetih lai hian, overdrawal tih avangin Mizoram sorkarin August 2025 chhung chauha pawisa (penalty) a chawi chu cheng nuai 85 chuang a ni.

Heng harsatnate pumpelh tur hian Mizoram chhungah kawlphetha siam chhuah a ṭulzia nimina ṭhutkhawmah hian tarlan a ni a; Mizoram sorkarin hydel project thar a buaipui mek megawatt 132 siam chhuak thei tur Tuivai HP chu chak zawka bawhzui an rel.

Tuivai HP hi a tirah public private partnership mode a tih tum a ni a, mahse, Mizoram sorkar ta liau liau a nih theih nan a ṭul anga bawhzui an rel a ni.