Transport minister Vanlalhlana'n Karnataka Transport department hmalaknate a tlawh

Transport minister Vanlalhlana chuan September 18, Ningani khan Bengaluru-ah Karnataka state sorkar hnuaia Transport department hmalaknate a hmunah a tlawh a, Karnataka Transport minister Dr Ramalinga Reddy nen an inkâwm bawk.

Vanlalhlana hian Karnataka state-a registered vehicle scrapping facility (RVSF) pahnih zinga pakhat, Devanahalli-a Mahindra MSTC Recycling Pvt Ltd (Cero) a tlawh a; thawktute'n lirthei chi hrang hrang an ṭhiah darh dan te, certificate of deposit, certificate of vehicle scrapping, lirthei neituin a thar a lei leh dawna rebate a claim dan leh motor part an lilâm dante an hrilhfiah.

Ministry of Road Transport and Higwhays (MoRTH) hmalaknaa din hmasak ber Inspection and Certification Centre, Nelamangala chu Minister hian tlawh bawk a, automated testing station-ah khawl hmanga lirthei endikna hrang hrang kalpui dante a en. Jnana Bharathi RTO hnuaia automated driving test centre pawh tlawhin, driving license dilte tana ruahmanna an siamte a zawtfiah a ni.

Transport minister Vanlalhlana hi Transport director R Lalrammawia leh under secretary Vanlalmuana ten an ṭawiawm.

Sorkar thuchhuah tarlan danin, Transport Minister-in a tlawh tâk hmun hrang hrangte hi MoRTH ruahman angin state tinah din tur a ni a; hmanrua leh khawlte nei ve turin Mizoram sorkarin hma a la mek a ni.