Japan mithiamte'n Mizo ṭhalaite an zirtir theih dan tur sawiho

Minister of state Lalnghinglova Hmar chuan September 18, Ningani khan New Delhi-ah Japan International Cooperation Agency (JICA), India hotute an pisaah a kâwm a; Tokyo-a Nippon Sports Science University nen ṭanghoin December 2025-ah Aizawlah Coach Development Workshop buatsaih an rêl.

Lalnghinglova Hmar chuan, Mizoramin Olympic 2036 hmathlir a neih thu sawiin, 'vision’ hmanga hmalaknate a sawi a; infiamna chi rukah Mizo coach-te zirtira kaihruaitu tur Japan Overseas Cooperation Volunteer (JOCV) hnena dilna an thehluh thu sawiin, Japanese coach-te Mizorama an kal theih nan chak zawka hma lakpui turin JICA hotute a ngen.

JICA India chief representative Takeuchi Takuro chuan, Mizorama infiamna lama hmathlir leh rawtnate chu JICA hmalak tum dan nen a inhnerem hle tih a sawi.

Inkawmnaah hian December 2025 thla laihâwlah Nippon Sports Science University nen ṭanghoin Aizawlah Coach Development Workshop buatsaih an rêl. Infiamna kaihhnawih thlur bing phawt a ni a, kum dangah chuan kut themthiamna lam leh thil dangahte pawh zirhona buatsaih zel tum a ni.

Mizoramin track & field, wrestling, judo, weightlifting, table tennis leh archery-ah JOCV volunteer a dilna chu tihhlawhtlin ngei an tum thu JICA India hotute chuan an sawi a; an harsatna pakhat - Mizorama lut tura Protected Area Permit ngai chungchang chu Home department hotute nen sawiho ni se, an ti.

LESDE minister Lalnghinglova chuan, Japan-in a mamawh nurse leh upa enkawltu (caregiver) tur Mizo ṭhalai zingah an tam thu a sawi bawk.