Khawzawlah multi spceciality clinic

Indian Medical Association (IMA) chuan nimin khan Khawzawl District Hospital-ah Multi Speciality Clinic an buatsaih a, Khawzawl bawrhsap K Vanlalṭhiana khuallian niin, Swasth Nari, Sashakt Parivar Abhiyan a hawng nghal.

Multi Speciality Clinic-ah hian mipui hriselna enfiah turin sorkar damdawi-inte bakah, Synod Hospital leh mimal damdawi-inte aṭangin doctor 54 an kal khawm a; medical department 15-a mite an ni. Inentirte mamawh damdawi eng emaw zat chu a thlawna pek a ni a, damdawi hi bialtu MLA W Chhuanawma'n a tum bakah, IMA, MGDA, Civil Hospital, ZFDA leh mimal ṭhahnem ngaite'n an thawh khawm a ni.

MSACS-in HIV & STI screening an buatsaih a, ZMCH-in Swasth Nari Sashaky Parivar Abhiyan hun an hmang bawk.

Multi Speciality Clinic-a inentir tura inziak mi 4,010 chuang an awm a, tlai dar 2 vel thlengin mi 2,729 an en tawh a ni.