KHAWTHLIR

Senior inkhawmpui

Naktuk September 21, Pathianni hi Mizo Sunday School Union (MSSU) hnuaia Senior Department Inkhawmpui hun a ni. Pastor bial hrang hrangah Senior depatrment-te an inkhawmpui dawn a, bial ṭhenkhatah chuan zaninah an ṭan ang. Mizoramah Presbyterian Kohhranah chuan kum 1954 khan Senior department din ṭan a ni.

Gas bûk tling lo man

Kolasib-a Legal Metrology enforcement chuan September 18, Ningani khan Kolasib-ah MIZOFED-in eirawngbawlna gas an sem tur an endik a, gas bûr bûk tling lo 20 hmu chhuakin an man. MIZOFED hi Rs 5,000 an chawitir nghal a ni.

Water purifier hlan

Lunglei District Congress Committee vice president Joseph R Lalremngheta chuan nimin khan Lunglei Press Club-a hman atan tui tihthianghlimna Kinsco Water Purifier a pe. Water purifier inhlanna hi Lunglei Press Club committee room-ah neih a ni a, LDCC Vice President hian Lunglei District MJA president H Lalthansanga hnenah a hlan a ni.

Office thar hawng

Social Welfare, Women & Child Development secretary Lalzarmawii chuan nimin khan Saituala District Social Welfare office, quarters leh Working Women Hostel (Sakhi Niwas) a hawng. Social Welfare pisa leh quarters hi Saitual Dinthar Vengah cheng nuai 111.12 sêngin sak a ni a, Working Women Hostel hi hmeichhia khual khuaa hnathawk emaw, lehkhazir/training emawa awmte tana buatsaih a ni.

AKA inzirtir

Aizawl, Champhai, Mamit leh Saitualah nimin khan District Level Orientation Training on Adi Karmayogi Abhiyan (AKA) - Responsive Governance Programme buatsaih a ni a, sorkar hotu hrang hrang an tel. Abhiyaan-in a tum ber chu - tribal area-ah chak taka sorkar inrelbawlna kalpui a nih theih nana sorkar mi leh sa nuai 20 chuang hruaitu ṭha ni thei tura chher chhuah a ni.