Contractor-te sum rulh that loh vangin PWD-in cheng nuai 68.91 a hloh

Mizoram PWD-in West Phaileng-Marpara kawng leh Bil­khawthlir-Saiphai-Natasura kawng siam tura a thlan, contractor pali hnenah hna thawh tak tak hmain 'advance' atan cheng nuai 515 a pek lâwk avangin sorkarin cheng nuai 68.91 a hloh.

July 8, 2015-a Assembly House-a pharh tâk Comptroller and Auditor General of India (CAG) Report 2013-14-in a tarlan danin, Central Public Works Department (CPWD) Manual para 31.5-ah chuan, cheng nuai 200 chin chunglam hnaah chuan hna thawhna tur sum ruahman (tender amount) aṭanga 10% chu contractor hnenah hna thawh hmain pek lâwk (advance) theih a ni.
Chutih rualin, advance pek zat aṭanga chhûtin, 10%-a a pung nen contractor-in sorkarah a rùl leh tur a ni a, sorkara rulh tur hi hna 10% zawh aṭanga pek ṭan tur niin, hna 80% zawh a nih hunah rulh zawh tawh tur a ni.
CAG report tarlan dan chuan, West Phaileng - Marpara kawng, km. 80-a thui siam hna (rehabilitation and resurfacing) thawk turin PWD chuan contrac­tor pathum a thlang a, sanction amount chu cheng nuai 4,619 a ni. Kawng siam tur chu hlawm thumah an ṭhen.
Kawng siam tura contractor thlante leh an siam tur chinte chu - Tantia Constructions Pvt. Ltd. km. 0-27 siam nan cheng nuai 142; F Kapsanga km. 27-54 siam nan nuai 142 leh, Lalthanṭhuami km. 54-80 siam nan nuai 135-te an ni.
West Phaileng-Marpara kawng siamna turah hian PWD Mamit Division-a executive engi­neer chuan CPWD Works Ma­nual para 31.5 bawhchhiain October 2011 leh February 2012 inkarah contractor pathumte hnen­ah advance cheng nuai 419 (9.07%) a pe a; PWD chuan contractor-te
aṭangin August-December 2012 chhungin cheng nuai 19 (4.53%) chiah a hmu let thung.
CAG auditor-te'n January 2013-a an enfiah lai thlengin PWD-in contractor pathumte hnena advance an pek cheng nuai 419 aṭanga kum khata 10%-a punga contractor-te'n sorkara an rulh tur zat chu cheng nuai 47.45 a ni a; nuai 19 chauh hmuh lêt a nih avangin sorkarin cheng nuai 28.45 a hloh a ni.
CAG-in an enfiah hnu, November 2013-a PWD-in CAG-a chhanna an pekah chuan, contractor-te hnena advance 10% pekah advance pek zat aṭanga 10% pung an rûl tur a ni tih PWD-in an hriat loh thu an tarlang. CAG Report chuan, "CPWD Manual para 31.5-ah chiang taka a inziah avangin PWD chhanna hi pawm theih a ni lo a, a hma pawhin sawi lan fo tawh a ni," a ti.
Mizoram PWD chuan Bil­khaw­thlir-Saiphai-Natasura kawng km. 20.504-a thui thawm ṭha turin Tantia Contructions a thlang a, kawng siamna tura sum ruahman chu cheng nuai 1,005 a ni.
PWD Kolasib Division-a executive engineer chuan Tantia Constructions hnenah hian June 2009-ah advance atan cheng nuai 95.71 a pe a, mahse October 2013-a CAG-in an enfiah thlengin contractor chuan 10% sorkara a rulh let tur cheng nuai 21.71 chu a rùl lo a ni.
West Phaileng-Marpara kawng leh Bilkhawthlir-Sai­phai-Natasura kawng siamna atana PWD-in contractor palite hnena advance a pek zawng zawng chu cheng nuai 515 a ni a, contractor-te aṭangin 10% pung a hmuh tur a hmuh ṭhat loh vangin Mizoram sorkar chuan September 2014 thlenga a pung tur nen chhûtin, cheng nuai 68.91 a hloh ta a ni.