Anti Dengue Month hawng
Nimin khan Aizawla IPR Auditorium-ah 'Anti Dengue Month' hawnna inkhawm hman a ni a, Health minister Lal Thanzara'n a hmanpui.
Inkhawmah hian kumin January-May chhungin Mizoramah khawsik chi khat (Dengue) vei mi 19 hmuhchhuah a nih tawh thu tarlan a ni.
Health Minister chuan, Anti Dengue Month-in a tum ber chu, Dengue vei tihtlem leh a vei an pun zel lohna tura ṭan lak a nih thu sawiin, "Dengue vanga tumah kan thih loh nana theihtawp chhuah hi kan tih tur a ni," a ti a; natna hrang hrang do kawngah department hrang hrang leh mipuite'n tih theih tam tak an neih thu a sawi.
Health secretary Lalhmingthanga chuan, Dengue dona atan Aizawl Civil Hospital leh Lunglei Civil Hospital chu Sentinel Surveilance Hospital atan puan a nih thu a sawi a, Dengue chungchangah hian awareness campaign-te neih ṭhin a nih thu a sawi.
Anti Dengue Month hawnnaa tarlan danin, Mizoramah Dengue natna thehdarhtu thosi dum leh vára ṭial (Aedes) a tam hle a; Dengue enkawlna bik damdawi emaw, invenna (vaccine) emaw a awm loh avangin ‘Tihdam aiin inven a awlsam zawk a, a tha zawk bawk a ni’ tih inzirtir a pawimawh a ni.
Kum 2012 khan Mizoramah Dengue vei mi paruk, kum 2013-ah mi pasarih, kum 2014-ah mi 19 leh kuminah May thla thlengin mi 19 hmuh chhuah tawh a ni.