MLA leh MP-te ngai pawimawh turin Sorkar hnathawkte hriattir an ni

General Administration Department (GAD) chuan July 9, 2015 khan sorkar hnathawkte'n MP leh MLA ni lai leh lo ni tawhte thu leh hla an ngai pawimawh tur a ni tih hriattirna (office memorandum) a tichhuak a; hriattirna zâwm lote chu na taka hrem an nih tur thu a tarlang.

GAD thuchhuah chuan, MP leh MLA-te thusawi bawhzui loh a awm ṭhin thu tarlangin, "Hemi chungchang hi March 24, 2015-a Assembly session neih ṭum pawhin sawi chhuah a ni. Khami ṭuma Chief Minister thusawi bawhzuina atan khan heng instruction hrang hrangte hi khauh taka kengkawh tura siam a ni," a ti.

GAD-in instruction a siamte

• MP, MLA, ex-MP leh ex-MLA ten hriat duh an neih an sawite uluk taka lo chhinchhiah tur. An thu leh hla dawn a ni ngei tih hriattirna ni 15 chhungin hriattir tur a ni a, hriattirna thawn aṭanga ni 15 chhungin a chhânna thawn tur.

• An thil hriat duh eng emaw vanga tihkhawtlai a ni emaw, department dang zawh ngaite a nih chuan thla khat chhungin thil awmzia hrilhhriat a, an thil duh an pek theih hun tur hriattir tel nghal tur.

• A concern department ni loa thil an zawt a nih chuan, a concern department hnenah kar khat chhunga thawn tur.

• An thil hriat duh tihhlawhtlinsak theih a nih loh chuan, a chhan chiang taka hrilhhriat tur.

• An thil duhte pek an nih dawnin, a remchan dan ang ngawt ni loin, a theih chin chinah an duh leh mamawh dan thlirsak tur.

• Department chuan MP, MLA, ex-MP leh ex-MLA tan hian register hran an siam ang. Acknowledgment thawn a nih tawh leh tawh loh te, chhanna thawn a nih leh nih loh te, hmalak a nih tawh leh tawh lohte leh thil dang pawimawh an chhinchhiah ang.