Mizoramah private college thar pahnih

Academic session thar 2015-16 aṭangin Aizawlah private evening college ṭan a ni dawn a, August thlaah ṭan an tum. Lungleiah private college thar din a ni bawk.

Higher & Technical Education (HTE) hotute'n Vanglaini palai an hrilh danin, Aizawl leh Lungleia private college din tharte hi sorkarin phalna a pe a, college-a zirlai luhna indaih lohna phuhrûkna tura tih a ni.

Academic session thara Govt. Aizawl College leh Hrangbana College-a morning class neihtir tum erawh chu sût a ni thung.

Lungleia colege thar hi KT College tih a ni a, Electric Vengah a awm. KT College hotute chuan, an college-in July 7, 2015 khan class an ṭan tih an sawi a, Arts subject chauh an la kalpui.

Aizawla private college din tur erawh hu an la ṭan chiah lo a, an buaipui mek. College hming tur chu Mizoram College of Social Science (MCOSS) tih a ni dawn a, a dintute chu Vanapa Society an ni.

Vanapa Society-ah hian chairman chu Rosiami a ni a, secretary chu Dr Lalhmingmawii a ni.

Dr Lalhmingmawii chuan Vanglaini palai zawhna chhangin, MCOSS-a admission tihna turin advertisement an chhuah mek thu leh admission a tih theih reng thu a sawi a, "College atan JL Higher Secondary School kan hmang rih dawn a, August thlaah class ṭan hman kan beisei. Tlai dar 3 aṭanga dar 6:30 chhungin class neih a ni ang. Arts leh Commerce zirna kan hawng dawn a, Bachelor of Social Works zirna hawn kan tum bawk," a ti.

Vanapa Society Secretary sawi danin, private college din tur hian detailed project report siamin, sorkarah an thlen a, sorkarin a pawmsak. Mizoram University-ah affiliation ti turin an indawr tawh a, dilna an la thehlut lo.

College din tur buaipuitu tur, coordinator atan tuna sorkar college-a thawk mek mi pathum an ruat a, chu'ng mi pathumte chuan zirtirtu tur dangte an sàwm bakah, college kalphung turte an duang a ni.

Dr Lalhmingmawii chuan, admission fee an la sáng dawn lo a, monthly fee pawh Rs. 800 a ni dawn tih sawiin, "Hlâwkna ûma ti kan ni lo a, zirlaite'n an mamawh vanga din kan ni," a ti. Zirtirtute pawh hlawh mumal an pe rih dawn lo a, chutiang tur chuan zirtirtu turte pawh an inhuam thu a sawi.

HTE department hotute chuan, nikum angin kuminah college-a admission chan loh vanga harsatna lian tham a awm loh thu sawiin, "A chhan ber chu kuminah pawl 12 pass chhuak an tlem zawk vang leh college din belh a nih tak vang a ni," an ti.

HTE hotute'n Vanglaini an hrilh danin, Mizorama sorkar college zingah college panga chiahin principal nghet an nei a; chungte chu - Institute of Advanced Study in Education (IASE), Saiha College, Lawngtlai College, Khawzawl College leh Saitual College-te an ni. College dang zawng chuan principal puitling an nei lo a, principal lakna tur MPSC-in a buaipui mek a ni.