MZU degree course result a chhuak Graduate thar mi 2,027 an awm
Mizoram University chuan nimin khan kumin May thlaa degree course final exam result a tichhuak a, graduate thar mi 2,027 an awm. A pumpuiah Hrangbana College-a Commerce zirlai, K Bijita Devi chuan mark 1,484 hmuin a sang ber.
2012 batch aṭangin degree course (sixth semester)-ah zirlai exam 3,155 zinga 2,027 an pass a, pass percentage chu 64.24% a ni. Arts-ah exam zawng zawng mi 2,617 zinga 1,653 (63.16%) an pass a, Science-ah candidtae 328 zinga 215 (65.54%) an pass. Commerce-ah zirlai exam mi 191 zinga 154 (80.62%) an pass a, Home Science-ah zirlai 19 zinga panga (26.31%) an pass bawk.
Repeater (2011 batch) zingah exam hmachhawntu mi 188 zinga 94 (50%) an pass a; Arts subject aṭangin 85, Science-ah pasarih leh Home Science aṭangin pahnih an pass.
MZU degree course-ah hian department 23 a awm a, Pachhunga University College (PUC)-in department 16-ah top rank holder an nei. Subject topper hi Govt. Aizawl College-in pakhat, Hrangbana College-in pathum, Zirtiri Residential Science College-in pathum an nei bawk. Arts leh Commerce-ah Higher and Technical Institute, Mizoram (HATIM)-a zirlai exam zawng zawng an pass a, 100% pass record nei college awmchhun an ni.
Arts subject 12-a topper zingah Sociology topper Vanlalpeka, PUC chuan mark a hmu sang ber a, mark 1,024 a hmu a; Science subject pakuaa mark hmu sang ber chu Mathematics-a topper Hmingsangliana, PUC niin, mark 1,129 a hmu. Home Science-a topper Linda Lalhlimpuii, Zirtiri College chuan mark 1,481 a hmu thung.
