Central sum hai luh dan tur sawiho

Nimin khan NLUP Conference Hall-ah Union Budget Provision for 10% Gross Budgetary Support (GBS) for NE Region leh Centrally Sponsored Scheme (CSS) chungchang sawiho a ni a; Planning Board vice chairman H Lian­sailova'n kaihruaiin, sorkara secretary-te leh department head-te an tel.

H Liansailova chuan, Central plan fund hnuai­ah a tam thei ang ber project thehluh a, a theih ang anga state tan sum hâi luh tum tur leh Central ministry-in sum an thawh theih tur project ngaihtuah chhuak turin department hotute chu a chah a; chutih rualin, a hnu lama state tana phurrit la ni thei turah erawh fimkhur a ngaih thu sawiin, "Mipui leh sorkar hnathawkte'n tih tak zeta taima leh rinawm taka kan thawh chuan sum hi pawimawh bawk mah se, harsa em em loin thui tak kan kal thei a ni," a ti.

Planning secretary Dr C Vanlalramsanga chuan, hmarchhak state tan bika Central ministry zawng zawngin hmasawnna atana GBS 10% an ruahman chungchang a sawifiah a; GBS 10% chu NLCPR/DoNER-a a luh hmain ministry aṭanga hnuh chhuah tum turin department hotute a fuih a ni.