Kolkata-a training turte an thlah

Mizoram Youth Commission (MYC)-in Emporium Training & Consultancy, Kolkata-a thla ruk chhung training tura a thlan Mizo nula 38-te pualin nimin khan ATI conference hall-ah thlahna inkhawm an hmang. NLUP Implementing Board chairman JH Ro­ṭhuama, MLA leh MYC chairman T Sangkunga, MLA ten an hmanpui.

JH Roṭhuama chuan, Mizo nulate chu MYC-in rintlaka a ngaih an nih thu sawiin, sorkar sum sênga zir an ni a, an vanneihzia hre chunga taima leh ṭhahnemngai taka zir turin a chah a, "Ram tana mi ṭangkai, in nu leh pate chhâwk zângkhaia châwmtu ni tura in zir a ngai a ni," a ti.

MYC chairman sawi danin, MYC-in tun thlenga training tura a tirh chhuah tawh chu mi 1,299 an ni a, chung zinga mi 631 chuan training zoin, hmun hrang hrangah hna an thawk mek a; training mek mi 668 an awm bawk.