Kolasib YMA-in kumpuan an sawiho

YMA sub-headquarters, Kolasib hnuaia Kumpuan Committee member te, Kolasib-a tlawmngai pawl hrang hrang te, V/C aiawh leh kohhran hruaitute chu nimin khan an ṭhukhawm a; YMA kumpuan, 'Ram leh hnam humhalh' bawhzui kawngah thawhhona ṭha tak neih ni se, an ti.

Kolasib sub-hqrs YMA president CT Mawia chuan inrâwn khawm buatsaih chhan a sawifiah a, "YMA kumpuan hi YMA-in a mal beih ngawt chi a ni lo. Pawl hrang hrang angin awm mah ila, kohhran hnuaia inzawm khawm vek kan ni. Kohhranin a tih loh chuan a hlawhtling thei tak tak lo," a ti.

Meeting-ah hian ILP chungchanga chak zawka hmalak te, electorall roll-a fimkhur lehzual te, Mizo hmeichhia hnam dang truck-a chuang awm ṭhin tihreh dan tur te, thing leh mau leh nungcha humhalh kawnga chak zawka hmalakte leh ruihhlo tihrêm kawnga chak zawka hmalakte an rel a ni.