Kuminah medical college ṭan dawn lo

Health minister Lal Thanzara chuan, Mizo­rama medical college hawn tum, Mizoram Institute of Medical Education and Research (MIMER) chu kuminah ṭan hman a ni dawn lo tih a tarlang.

Assembly session zawh taka Health Minis­ter-in MNF mem­ber Dr K Beichhua zawhna ziaka a chhan danin, Mizorama medical college hawn tumah hian Mizoram sorkarin zirlai 50 tan seat hawn a tum a, mahse sorkar laipuiin seat 100 awm theihna chauh hawn a remtih tawh avangin harsatna a awm a ni.

Chief Minister hoa official-te ṭhut­khawm­naah MIMER chu zirlai zirlai 50 awm theihna turin DPR siam an rel angin, Health & Family Wel­fare ministry-ah thehluh a ni a; Health minis­try hnuaia Tech­nical Committee leh Em­pow­ered Committee ten an lo zir chian Medi­cal Council of India (MCI)-ah an thawn a ni.

MIMER DPR hi MCI chuan February 15, 2015 khan an pawm loh thu HFW ministry-ah an thlen a, chu thu chu HFW ministry chuan June 15, 2015 khan Mizoram sorkar a rawn hriattir a ni. MIMER DPR pawm a nih loh chhan chu - Union Cabinet-in medical college chu batch khatah seat 100 aia tlem lo chauh hawn a remtih tawh vang niin an tarlang.

Hetih lai hian, Mizo­ram sorkar chuan MIMER atan DPR siam ṭha lehin, zirlai 100 admit theihna turin an ti a, chu chu May 2015-ah HFW ministry-ah an thehlut leh tawh. MIMER dinna atana Mizoram sorkarin sum a tum ve tur, Rs. 5,56,00,000 pawh June 2015 khan Finance department-in Health department-ah a pe tawh a ni.

MIMER director atan hian RIMS, Imphal-a director Dr L Fimate chu thlan a lo ni tawh a; MIMER atana staff quarters siam ṭhat ngai zinga la siam that loh 15 pawh siam ṭhat mek a nih thu leh, Health department-in sum a hmuh tawhte chu class room, hostel, practical room sak leh thuam ṭhat nan hman tum a nih thum, Health Minister chuan a tarlang bawk.