Hmarchhak CM-te inhmuhkhawmnaah CM Hawla'n HPC(D) chêt dan a sawi

Chief minister Lal Thanhawla chuan Hmar Peoples’ Convention (Democratics)-te'n Mizoram sorkar leh mipui pawi an khawih ṭhin thu a sawi a, "HPC(D)-te hi ûmzui an nih theih nan Assam leh Manipur sorkarin Mizoram police-te zalen taka chêt an phalsak a ṭul," a ti.

Union Home minister Rajnath Singh hoin July 11, 2015 khan Guwa­hati-ah hmarchhak state-a chief minister-te chu venhimna chungchangah an inhmukhawm a; chutah chuan CM lal Thanhawla'n HPC(D) chungchang a sawi lang a ni.
Chief Minister chuan, HPC(D)-te chu Manipur-ah an inkhuar tih sawiin, March 28, 2015-ah pawh Mizoram Assembly Assurance Committee member-te Zokhawthiang bulah lambunin police pathum an kah hlum bakah, mi dang paruk an kah hliam thu a sawi lang. HPC(D)-te tawmbûk chu Assam, Manipur leh Mizoram inrìna lai velah a awm avangin, ûmzuia man an harsa ṭhin a, chuvang chuan Manipur leh Assam sorkarin Mizoram police-te zalên taka an chêt vel an phalsak a ṭul thu a sawi.
Mizoram chu international border km. 722-a thui nei a nih thu sawiin, Lal Thanhawla chuan, state ṭhenkhata hel pawlte'n silai leh thil dang tawlh rûkna atan an hman ṭhin thu a sawi a, "Hel pawlte chêt vel dan hi enthlak reng a ni. Mizoram invenhimna erawh an tiderthawng pha lo. Mizoram tlâk lama ralthuam cheleka che ṭhin Bru-te pawh sorkarin a thunun thei a ni," a ti.
CM Hawla chuan, dan leh thupek hneh taka kenkawh a nih theih nan Central sorkar hnuaia ‘Security Related Expenditure’ (SRE) scheme chu Mizoramah hman ve a nih theihna tura hma la turin Home minister Rajnath Singh a ngen a; Border Wing Home Guards din phal turin a ngen bawk.
Chief Minister chuan, Mi­­zo­ram chhunga India leh Bang­ladesh inrìnaa pal pin leh motor kawngpui siam hna kalpui mekah contractor-in anmahni duh anga an kalpui thu sawiin, chu chuan a chhehvela mite harsatna nasa tak a siam thu a sawi a, "Ramria kawngpui, border road 24 BRTF leh Project Pushpak of Border Roads Organisation ten an enkawlte hi Central sorkar aṭanga sum hmuh ṭhat loh vangin a chhe tawh hle a ni," a ti.
Meeting-ah hian DoNER minister Dr Jitendra Singh leh Minister of state for Home Kiren Rijiju te pawh an tel.