KHAWTHLIR

CM zawh theih
Mizoram sorkar chuan thuchhuah siamin, sorkara thil hriat duh neite'n CM Online-ah SMS leh website-ah zawhna an zawh theih thu a tarlang. SMS hmanga zawhna zawt duhte chuan mobile phone number 9248006202-ah thawn tur a ni a, zawhna zawh hmain 'CM' tih chhut tur. Wesbite-a zawhna zawt duh chuan cmonline.mizoram.gov.in ah luh tur a ni.

Sumdawnna Lirthei 21,214
Transport minister John Rotluangliana chuan Assembly session neih zawh takah khan MNF member Lalrinawma zawhna ziaka chhangin, March 31, 2015 thlengin Mizoramah sumdawn nana hman lirthei 21,214 a awm tih a tarlang.

Ph.D hmu thar
Lalchhuanmawia, T Romana College-a assistant professor chuan Mizoram University aṭangin Economics-ah doctor of philosophy a hmu thar a, a thesis title chu 'Economics of production and marketing of Horticultural crops in Mizoram: A study of selected crops' tih a ni.

In him lo
Disaster Management & Rehabilitation minister C Ngunlianchunga'n Assembly session zawh taka Dr K Beichhua zawhna ziaka a chhan danin, Aizawlah in him lo Dawrpui Vengah a awm thu a tarlang. In him lo pakhat chu ADDMA-in ṭhiat turin a ti a, Gauhati High Court Aizawl Bench pawhin a pawm a; mahse, in neituin Gauhati High Court Division Bench-ah a thlen leh avangin Court-in stay order a chhuah a ni.

SDA vaihlo dona
Seventhday Adventist, Aizawl East-a Children Ministries Department chuan July 10, 2015 khan Tobacco Exchange Programme an hmang a, khawpui dáia zin veivakte chawlhna hmun hrang hrangah meizûk ṭhat lohzia an tlangaupui a, thuziakte an sem a ni.

ADC-ah CSS hna
Kum 2014-15 chhung khan autonomous district council pathumah centrally sponsored scheme hnuaiah Rs. 47,31,85,000 man hna thawh a nih thu, District Council Affairs enkawltu, CM Lal Thanhawla'n a tarlang.