Greenline Express tikhawtlai hret

Aizawl Municipal Council (AMC) leh Aizawl City Bus Owners Association (ACBOA)-in vawiin aṭanga Aizawla Greenline Express bus tlantir an tum chu tihfel ngai a la awm avangin an tihkhawtlai rih dawn.

AMC executive councillor Rosiamngheta sawi danin, Greeline Express bus tlantir tum tihkhawtlai a ngaih chhan ber chu - bus chuan man turah State Transport Authority (STA) nena thil tihfel ngai a la awm vang a ni a; rei lote chhunga tihfel a, bus tlan ṭantir thuai beisei a ni.

Transport secretary R Hrang­tawna chuan Vanglaini palai zawhna chhangin, AMC hian Greenline Express tlan tir turin State Transport Authority (STA) aṭangin phalna engmah an nei lo tih sawiin, "STA-in engmah a hriatpui loh avangin tlan rih lo tura hriattir a ni," a ti.

R Hrangtawna sawi danin, Greenline Express hi tun hnai khan Transport Minister hoa ngaihtuah a ni. Meeting chuan AMC leh ACBOA tena an ruahmanna hi ṭha an tih rualin, dan anga thil tih hi a ṭha berin an hria a ni. Greenline Express hi dan anga a tlan theihna atan sorkar chu a inhawng reng a ni.