Serlui-A Gravity Scheme hman ṭan a ni
PHE department-in electric leh diesel hmang loa lei hîpna (gravity) hmanga tui pump theihna tura an siam, Serlui-A Gravity Scheme chu Inrinni aṭang khan hman ṭan a ni.
He scheme hmang hian kum khatah cheng nuai 160 vel an hum theih PHE department hotute chuan an beisei.
PHE minister Zodintluanga chuan Inrinni khan Dihmunzawla PHE department tui pump-na hmun hmun a tlawh a, Serlui-A Gravity Scheme hmanga tui an lak a enpui. Aizawl Greater Water Supply Scheme Phase I leh II pawh tlawh nghalin, engineer-te nen tihhmasawn zel dan tur an sawiho.
PHE hotute sawi danin, Serlui-A Gravity Scheme atan hian Lungleng kái chhakah Tlawng lui an khuap a, chuta ṭang chuan pipe feet khat leh a chanve (diameter)-a lian hmangin PHE tui sawngbawlna hmun Dihmunzawlah tui an la a ni. Tui lâkna leh Dihmunzawl inkar chu km. 7-a thui a nih thu an sawi.
Serlui-A Gravity Scheme hi kum khatah ruahtui tam deuh lai thla nga chhung vel chu mamawh ang zat tui lakna atan hman theih beisei a ni.
Aizawl Greater Water Supply Scheme Phase I leh II aṭangin chawhrualin ni khatah dar 15 vel electric emaw, diesel emaw hmangin tui pump ṭhin a ni a; electric leh diesel manah sum tam tak sèn ṭhin a ni.
Serlui-A Gravity Scheme hman a nih tâk avangin electric leh diesel mamawh nasa takin a tlahniam a, ruahtui tlak lai thla nga chhung ringawtah pawh diesel leh kawlphetha mana an hman ṭhin cheng nuai 160 vel an hum thei turah an ngai a ni.