'Thlarau MR' tihbo vangin sorkarin Cheng nuai 5800 vel hum thei dawn

Planning leh Finance changtu minister Lalsawta chuan, August 2014 aṭanga muster roll (MR)-a thawk anga ziah, a mihring hmuh tur awm si lo (Thlarau MR) nuai bo tura ṭan an lak avangin kum khat chhungin sorkarin cheng nuai 5,800 vel an hum phah dawn niin a sawi.

Vanglaini palaiin a pisaa a kawmnaah Lalsawta chuan, Mizo­ram sorkarin inrelbawlna leh sum lama inrenchemna atan nasa takin ṭan a la mek tih a sawi a, "Tuna kan tih ang hian kum 10 emaw, kum 15 emaw kal ta aṭang khan lo ti ila chuan tunah hian harsatna a awm ka ring lo. Sum harsatna chingfel tur leh inrenchemna kawnga kan hmalaknaah hian kan damdawi hman a khâ a nih pawhin, ram leh hnam tana kawng kan sialnaah kan ngai," a ti.

Finance Minister chuan, sorkar sum harsatna siamṭha tur leh inrel­bawlnaa thil ṭul lo leh dik lo siam ṭha turin an thawk rim a, an hmalaknaah thil dik lo tam tak an hâi chhuak mek niin a sawi a, an hmalaknaah dik lo kan hmuh chhuah zel avangin mi dik lote chuan an haw mai thei tih a sawi.

An sorkar chhungin sum harsatna nasa taka siam ṭhat an beisei thu sawiin, Minister chuan, "Kum 2018 laihâwlah chuan kan harsatna tam tak hi a kiam hman kan beisei. Ram sum dinhmun siam ṭha tura kan pênnaah, a hnua sorkar leh zel turte tan kawng kan sial ngei turah kan inngai," a ti a; an hmalakna chu Chief Minister-in a phûrpui hle niin a sawi.

Lalsawta sawi danin, Planning department leh Finance department-in hun rei tawh tak aṭangin sorkar department hrang hranga 'Thlarau MR' tihreh tumin ṭan an la a, an hmalaknain rah a chhuah mek. Sorkar kum liam­taah khan MR dik tak hriat tuma an thawh aṭangin cheng nuai 5,800 vel an hum phah thei turah an ngai.

August 2014 aṭang khan sorkar department hrang hranga Thlarau MR hriat chhuah tumin nasa takin ṭan an la a, MR-te chu a mihring awm tak tak a nih leh nih loh fiah nan Electoral Photo Identity Card (EPIC) hmangin an enfiah.

Sorkar department-te hnenah an hnuaia thawk MR-te chu EPIC an neih loh chuan Finance department aṭangin an hlawh tur pek a nih tawh dawn loh thu hriattir an ni a; hei vang hian department ṭhenkhat chu an buai phah hlea sawi a ni.

Tun hmain sorkar department-te'n Plan allocation an siamin, hlawh tur a hranpain an chhinchhiah ngai lo a, an sum neihte chu anmahni remchan dan angin an hmang mai ṭhin. Tunah erawh chuan department-te chu an MR-te hlawh tur bik a hranpaa chhinchhiahtir an nih bakah, department-a thawkte hlawh tur zawng zawng pawh chhûttir sa vek an ni.

Planning Minister chuan, MR-te tan EPIC an phût tâk avang leh department-a thawkte hlawh tur reng reng Plan-ah chhinchhiah sa tura an tih avang hian MR dinhmun dik tak an hriat theih phah niin a sawi.

Finance Minister chuan, sorkar hnathawk damdawia inelkawlna senso phuhrûkna, MR bill siam ṭhat dan tur ngaihtuahtu tur pawh chief secretary kaihhruaiin din a nih tawh thu leh, páwn lam aṭangin rawtna thlen theih a nih tur thu a sawi bawk.