World Population Day hman a ni Mizorama mihring punna rate a hniam

July 11 kha World Population Day a ni. He ni pual hian Mizoram hmun ṭhenkhatah chuan hun hman a ni a, Ignite Studio, Aizawlah Health minister Lal Thanzara hoin family planning chungchang sawiho a ni. Health department chuan, India ram puma mihring punna (growth rate) aiin, Mizoram bika growth rate a niam zawk tih an tarlang.

Lal Thanzara chuan, mihringin awmze nei taka khawvel kan luah a ngai tih sawiin, chhungkaw din mek leh din leh zel turte'n ruahmanna fel tak neia fa neih a pawimawh tih a sawi a, "Family planning hian fa neih tlem ringawt a hawi Io a, chhang bun dan tâwk te, eizawnna mila fa neih dan te, duhtâwk hnua insiam dan leh fa nei thei Iote'n fa an neih theih dan tur ngaihtuahpui thlengin a huam a ni," a ti.

Sawihona hunah tlawmngai pawl leh kohhran hrang hrang aṭanga sawm bikte'n an ngaihdante an sawi a, zawhna an neihte chu Health department-a doctor-te'n an chháng a ni.

Lawngtlaiah pawh World Popula­tion Day pualin DC conference hall-ah hun hman a ni a, Lawngtlai DC J Hmingthanmawia chuan, World Population Day-in a tum pawimawh ber pakhat chu ruahmanna fel tak neia chhungkaw din leh enkawl a nih thu a sawi.

World Population Day hi July 11, 1987 aṭangin khawvelah hman tan a ni a, a hman ṭanna ní hi khawvela mihring cheng tluklehdingawn 5 an tlinna ní a ni.

Kumina World Population Day thupui chu 'Chhungkaw hrisel nan leh hlim nan kum thum danah fa nei rawh' tih a ni. June 27 - July 10 chhung khan 'Mobilisation Fortnight' hman a lo ni tawh a; July 11-24 chhungin 'Population Fortnight' hman leh tur a ni a, hrisel taka nau pâi leh neih theih dan te, naute leh a nu hriselna te, indanna hmanraw chungchangte an zirtir dawn.

Health department tarlan danin, India chu khawvela mihring tamna ber dawttu niin, mi tluklehdingawn 1.28 an awm a, khawvel mihring paruk zela pakhat chu India mi an ni.

Registrar General of India-in Sample Registration System 2013 a tihchhuaha a lan danin, Mizorama birth (naute piang) rate chu 16.1 a nih laiin, death (mihring thi) rate chu 4.3 a ni a; Mizoram punna (growth rate) chu 11.8 a nih laiin, India ram puma growth rate chu 14.4 a ni.