SSA sum tur cheng nuai 1927.90 a tâng

Mizoram SSA hnuaia thawkte chu thla thum chhung hlawh an la lo tawh. School Education minister H Rohluna chuan July 9, 2015 khan Assembly session-ah SSA-a thawkte chu March 2015 thleng hlawh pek an ni a, April 2015 aṭangin hlawh pek an la nih loh thu a tarlang. SSA sum tur la pek loh nuai 1927.90 a awm.

MNF member Dr K Beichhua zawhna ziaka H Rohluna chhan danin, kum 2014-15 chhunga Mizoram SSA sum hman turin Project Approval Borad-in cheng nuai 21046.25 a pawm a, mahse sorkar laipui chuan nuai 14739.697 a rawn pe thung. Mizoram sorkarin matching share cheng nuai 1218.25 a pe bawk a; sorkar laipui leh Mizo­ram sorkar sum pekte zinga nuai 1927.90 erawh chu tun thlengin SSA-in an la dawng lo a ni.

Dr K Beichhua zawhna dang School Education Minister-in a chhannaa a lan danin, RMSA hnuaia Inclusive Education for Disabled Students in Secondary Level Intervention kaltlangin kum 2014-15 chhung khan naupang 809-in ṭanpuina an dawng a, naupang pakhat tan Rs. 2,154.51 ruahman a ni. Kum 2013-14 ah erawh chuan naupang pakhat tan Rs. 3,000 ruahman ni mah se, sorkar laipuiin sum a pek loh avangin ṭanpuina pek a ni lo.

INC member R Vanlalvena zawhna ziaka a chhannaah, Minister Rohluna chuan, Mizoram SSA-in motor pariat, Gypsy vek neih thu leh, private motor 25 a hmansak (hire) mek thu a tarlang. Private motor hmante tan motor pakhatah thla khat atan petrol/diesel litre 60 zel pek a ni a; motor hman man chu thla khatah executive class-ah Rs. 36,000, first class-ah Rs. 34,000 leh second class-ah Rs. 32,000 a ni.

SSA-in private motor an hman dan chu - State Project Office-in Scorpio leh Safari pakhat ve ve leh Bolero panga; Aizawl district-in Bolero pathum; Lunglei district-in Bolero pathum; Saiha district-in Bolero leh Gypsy pakhat ve ve; Lawngtlai district-in Bolero leh Gypsy pakhat ve ve; Serchhip district-in Bolero leh Gypsy pakhat ve ve; Mamit district-in Bolero pahnih; Kolasib district-in Bolero pahnih leh Champhai district-in Bolero pahnih a ni.

Education Minister chuan, SSA-in kum 2010-14 chhunga stationery atana sum a sen zat a tarlang a; chungte chu - kum 2010-11 ah Rs. 5,95,351, kum 2011-12 ah Rs. 9,93,595, kum 2012-13 ah Rs. 17,16,018 leh kum 2013-14 ah Rs. 8,71,756 te a ni. SSA hnuaiah Residential Training Centre 29 leh Non Residential Training Centre 26 a awm thu a tarlang bawk.