Sorkar kalphung siam ṭhatna turin FMGEW-in sorkarah rawtna an thlen

Federation of Mizoram Government Employees & Workers (FMGEW) chuan, sorkar kalphung ṭhenkhat siam ṭhatna tur leh sorkar hnathawh dana ṭha tur zawka an ngaihte tun hnai khan Finance Minister Lalsawta hnenah an thlen. FMGEW hi Mizoram sorkar hnathawk pawl hrang hrangte intêl khawmna a ni.

FMGEW president Lalram­mawia chuan rawtna an thlen chhan sawiin, "Sorkar kalphung fel lo siam ṭhatna tur leh ram dinhmun kan ngaih vang a ni a, keimahni pawh inhrêk ngai se, ramin a ṭhatpui kan duh vang a ni," a ti.

FMGEW President sawi danin, Finance Minister-in Mizo­ram sum dinhmun ṭha lo leh a siamṭhatna tur a vei tak tak niin an hria a, a pisaa FMGEW hruaitute'n an hmuh ṭumin

ṭum hnih a lo ngen tawh a ni. Minister ngenna chu FMGEW-in an ngaihtuah a, an hnuaia association hrang hrang aṭanga rawtna an neihte an zir chian hnuah sorkarah an thlen ta a ni.

Lalrammawia chuan, FMGEW rawtna an thlenah sorkar hnathawk khawi pawl bik emaw sawiselna leh hamṭhatna lam a lan loh thu leh, ram tan leh sorkar kalphung tana ṭha ber an duh vang a nih thu a sawi a, "Sorkar hnathawkte inhrêkna tur a awm nual a, ram tana thil pawimawh tak tak a tam hle a ni," a ti.

FMGEW-in rawtna an thlen zingah chuan, Food Civil Supplies & Consumers Affairs department kaihhnawihah, tlawmngai pawlte nen Economic Baseline Survey (EBS) neiin, siamṭhat ngai laia an hriat eng emaw zat an tarlang.

Sorkarin officer-te ration card sorkara pe (surrender) tura a tih chuan kawngro a su pha lutuka an rin loh thu an ziak a; ration card-a mihring nuai 15 vel awm chu siam ṭhat a nih theih dan tur te, sorkar hnathawkte aia dinhmun ṭha zawka awm contractor leh sumdawng hausa zawkte chu EBS hmanga zawn chhuah a, ration card surrender ve tura an duh thu te, buhfai phurhnaah dik lo awma an hriat thute an tarlang a ni.